رواية موضوع عائلي الفصل العاشر 10 الجزء الثالث بقلم رحاب القاضي

 رواية موضوع عائلي الفصل العاشر 10 الجزء الثالث بقلم رحاب القاضي

#موضوع_عائلي

"بيت الهنا" 

_الحلقه العااااااشره 

ـــــــــــــــــــــــــــــ

_ماذا لو اختفت كلمة "لَيْت" هل سيختفي الندم ايضاً؟ 

ـــــــــــــــــــــــــــــ

أمير

وحشتيني اووي يا روان.. 

_اتوترت روان جدا وبان عليها الخوف وهي بتبص لعبدالله، اللي قام وقف ومسك امير من هدومه وقاله بنبره غاضبه جداً.. 

عبدالله 

هي مين دي اللي وحشتك يا روح امك.. 

امير ببرود

ايه ده انتي معاكي حد سوري يا اسطا ما اخدتش بالي.. 

عبدالله بغضب

بسيطه اخليك تاخد بالك بعد كده.. 

_قال كلامه ومسك كوباية العصير اللي علي التربيزه  وخبطها جامد علي دماغ امير اللي صرخ بألم وراسه نزفت علي طول، وما اكتفااش بكده ده كمان ضربه بالبوكس في وشه خلاه وقع علي الارض ومال عليه وقال بحده... 

عبدالله 

لو عينك اترفعت فيها تاني هشيلهالك خالص،فاهم يالااااا... 

_واتلمت اليهم النااس بسرعه اللي في المطعم وبعدو عبدالله عنه... 

وجه مدير المطعم وقال بحده

جرا ايه يا استاذ اللي انت عملته ده اا.. 

قاطعه عبدالله وقال بجمود ونبره واثقه

عبدالله القاضي لو عايز تعمل محضر انت والعيل ده اعمل بس اللي ما يزعلش.. 

_قال كلامه وسابه وطلع الحساب بكل هدوء قدام روان اللي واقفه خايفه جداً، وراح مسك ايدها واخدها ومشيو... 

ــــــــــ #بقلم_الكاتبه_رحاب_القاضي ــــــــ

_في الوقت ده وصل يونس بيته، وطلع بسرعه لاوضته هو وشهد لقاها قاعده علي مكتبها ومندمجه في شغلها، ولوهله قلبه اتقبض بخوف وقفل الباب بهدوء وقال.. 

يونس

شهد.. 

ردت عليه من غير ما تبصله

معلش يا حبيبي لو عايز حاجه اعملها لنفسك عشان عندي شغل مهم اووي، بقولك ايه ابقي كلم حامد ابن اخوك وقوله يجيلي بكره الشركه انا عايزااه معايا الفتره الجايه في الشغل و.. 

قاطعها وقال بجمود

ايه اللي قالتهولك نادين يا شهد، وايه اللي تعرفيه ومخبياه عني؟.. 

_بصتله واتملت عيونها دموع وكانت نظرتها ليه المره دي غريبه جداً وكلها لوم وغضب وخوف وحزن.. 

_راح بسرعه وقعد قدامها علي الارض ومسك ايدها وقال بهدوء.. 

يونس

كل اللي قالته كدب واي حد قالك حاجه عني كدااب.. 

سحبت ايدها منه وقالت بجمود

ما حدش كدااب غيرك انت.. 

يونس بصدمه

شهد انتي بتقولي ايه؟.. 

وقفت شهد بعيد عنه وقالت بحده

ايه وجعتك لما قولتلك الحقيقه، لا دي مش الحقيقه بس في حاجات كتير كتماها في قلبي من زمان وسيباك تمثل عليا دور الزوج الصالح المحترم بس انت راجل وسخ.. 

يونس بحده

انتي اتجننتي يا شهد حتت عيله تيجي تضحك عليكي وانتي تصدقيها لا وعامله دور الضحيه وكاتمه ومش عارف ايه، انتي غبيه اووي والله.. 

شهد بدموع

تحب اقولك من عشرين سنه للنهارده كام مره خونتني تحب اقولك اسماء الستات اللي عرفتها عليا كلها وسنهم كمان وعرفتهم فين وعلاقتك معاهم وصلت لايه.. 

يونس بقلق

اكيد في حاجه غلط انتي مش فاهمه حاجه.. 

شهد 

لا انا فاهمه كل حاجه كويس، كنت بترجع من بره وانا عارفه انك كنت مع غيري وكنت بدوس علي قلبي واتعامل معاك عادي واقولك حاضر ونعم عشان ولادي وعشان البيت ده، وعشان لو سيبتك انت ما كنتش هتسيبني في حالي وكنت خايفه علي ولادي يتأثرو بطلاقنا لو اطلقت تاني واللي زودها عليا لما حملت بيارا ، بس انت معاك حق  انا كنت غبيه فعلا لما اتحملت السنين دي كلها.. 

يونس بقلق

طيب اهدي وخليني افهمك اللي حصل ده.. 

شهد 

انا هاديه جداً ما تخافش انا لا هعيط ولا هزعق ولا هتخانق معاك، كنت هعمل كده لو كنت فارق معايا بس انا كرهتك ورحمة ابويا وامي كرهتك وما بقيتش فارق معايا خالص.. 

يونس بدموع

كانت غلطه زمان ووالله بقالي فتره كبيره ما في حاجه من الكلام ده في حياتي.. 

شهد 

هي خلصت يا يونس، انا كنت مكمله معاك بالصوره اللي انت عايزها وكنت سيباك تستغفلني بمزاجي، انما بعد ما انت عرفت كل حاجه وما بقاش في حاجه تستخبي انا مش هقدر ارجع اتعامل معاك عادي زي الاول.. 

يونس بحده 

يا شهد افهمي انا ما كنتش عارف بعمل ايه وقتها، بس ندمت والله.. 

شهد 

لنفسك يا حبيبي مش ليا، قولتلك انت ما تفرقش معايا خلاص خلصت كده.. 

يونس 

مستحيل انتي مش هتمشي من هنا ومش هطلقك... 

شهد 

ومين فالك اني هتطلق ولا همشي من هنا، لا فووق انا اللي عملت البيت ده انا اللي كبرت ولادي وبيا انا وبوجودي هنا انت ناجح وولادك ناجحين، ومش هطلق دلوقتي لحد ما اطمن علي ولادي وكل واحد تبقاله حياته الخاصه، بس من النهارده وجودي معاك منظر قدام الناس وولادنا وبس.. 

يونس بخوف

يعني ايه؟.. 

_مسكت شهد مخده من علي السرير ورمتها علي الكنبه وقالت بثبات وهدوء.. 

شهد 

دي مكانك. هنا من النهارده، ولو عايز حاجه تعملها لنفسك ومالكش اي كلام عليا، ده لو يعني عايز تخافظ علي منظرك قدام ولادك، عشان ورحمة ابويا وامي لو عملت حاجه تدايقني يا يونس هفضحك قدام ولادك يا بتاع المبادئ والاخلاق.. 

_قالت كلامها وسابته واقف مصدوم ودخلت الحمام، وقفت قدام المرايا وابتسمت برضا وقالت بهدوء.. 

شهد 

مش همثل تاني مش هتوجع واسكت تاني يا يونس، جه الدور عليك تبقي انت الصوره وتشوف وتسكت.. 

ــــــــــ #بقلم_الكاتبه_رحاب_القاضي ــــــــ

_وفي عربية عبدالله كانت روان حالتها لا تحسد عليها ابداً وخصوصا بسبب سكوت عبدالله اللي ما اتكلمش ولا كلمه من اول ما طلعو من المطعم وكان بيسوق العربيه وهو مدايق جداً.. 

اخدت نفس عميق وقالت بتوتر

هه هو الولد ده زميلي في الجامعه.. 

ما ردش عليها وعي بصتله بدموع وقالت

ممكن تسمعني يا عبدالله.. 

وقف العربيه وبصلها بجمود وقال

هو زميلك في الجامعه يقولك وحشتيني، ويبقي ليه في زمايلك ولاد اصلا، ده رضوي اختك اللي هي بنت خالي وكانت خطيبة اخويا لما كانت معايا في الجامعه كنت مش بكلمها غير للضروره وبينا حدود للنهارده.. 

روان بأحراج وتوتر ردت عليه

هو ما كانش زميلي اووي يعني، لما عرفت اخلاقه بطلت اتكلم معاه خالص والله، ممكن ما تقولش لبابا حاحه عشان خاطري.. 

_اتنهد عبدالله بضيق وبص قدامه من غير ما يرد عليها، وزاد هي خوفها اضعاف وقالت برجاء.. 

روان

عشان خاطري يا عبدالله انا مش عايزه بابا يزعل مني تان.. يعني اقصد ان انا ديما بزعله ومش عايزه ازعله تاني مني.. 

رد عليها بحده وقال

انا مش هقول لابوكي يا روان اطمني، بس انا من حقي افهم مين الولد ده وايه اللي كان بينكم عشان يجي يقولك وحشتيني وانتي قاعده معايا علي اساس ايه؟.. 

روان بخوف 

زي ما قولتلك كان زميلي في الجامعه من فتره بس.. 

عبدالله بجمود

زميلك وبس؟؟.. 

روان بقلق

ايوه.. 

عبدالله بغضب

طيب عشان نبقي متفقين يا روان انا مراتي مش هتتعامل مع اي حد غريب، سيف وزين وكمال دول زي طارق بالنسبالي وبرضو تبقي في حدود معاهم وانتي فاهمه قصدي.. 

وتابع كلامه بنبره غاضبه اكتر

ولو في يوم عرفت ان الولد ده ما كانش مجرد زميل وبس رد فعلي هيبقي وحش اوووي وقتها تمام.. 

روان بخوف شديد 

لا هو زي ما قولتلك بس.. 

عبدالله بجمود

ماشي يا روان.. 

_ورجع ساق عربيته وحاول يقنع نفسه بكلامها بس توترها وخوفها خلو الشكوك تزيد جواه من ناحيتها، وبعد شويه وصلو البيت وقبل ما تدخل بيتهم قالها عبدالله بجمود.. 

عبدالله

بكره الصبح هستناكي انتي ومرات خالي هننزل نجيب الشبكه والفستان اللي هتحضري بيه كتب الكتاب.. 

روان بضيق

حاضر... تصبح علي خير.. 

_وقبل ما تسمع رده دخلت بسرعه بيتهم ولقيت رضوي وروفان وروز قاعدين مدايقين جداً.. 

روان 

في ايه مالكم قاعدين كده ليه، وريناد مش قالت انها هتبات هنا النهارده راحت فين؟.. 

روفان بغيظ 

ما انتي اخدتي عبدالله ومشيتي والبيت ولع بعد كده.. 

روان بقلق

ولع ازاي في ايه يا رضوي.. 

رضوي بدموع

بابا وطارق اتخانقو وطارق ساب البيت وحالف انه يساقر النهارده.. 

روان بخوف 

ليه كده طيب ويسافر النهارده ازاي.. 

رضوي 

بابا بصراحه زودهم اووي معاه، هو ايوه الولد وبابا عايز يشد عليه بس مش بالطريقه دي برضو.. 

روان بدموع

تصدقي ان ده اكتر وقت محتاجه فيه طارق، ياريت ما فيش المشاكل دي كلها معاه كنت هقدر اتكلم معاه واشيله همي، كان هيفهمني اكتر من بابا.. 

طلعت ليلي في الوقت ده من المطبخ وقالت بحده 

في ايه يا بت انتي منك ليها، بقي ابوكم وحش دلوقتي.. 

روان 

يعني مش شايفه اللي بيعمله مع طارق يا ماما.. 

ليلي 

عادي اي اب وابنه بينخانقو وهو مش قايد عليه بالنار يعني عشان تتكلمو عليه بالطريقه دي، ولو انتو بتحبو طارق قراط فابوكم بيحبو اربعه وعشرين.. 

رضوي

يا ماما احنا اا.. 

ليلي بحده 

بلا يا ماما بلا زفت اتنيلو كملو باقي تنضيف المطبخ انا حيلي اتهد وعايزه انام، واول واخر مره اسمعكم بتتكلمو عن ابوكم كده انتو فاهمين ولا لا.. 

رضوي 

انا اسفه يا ماما ووالله ما كنت اقصد حاجه وحشه علي بابا.. 

روان

انا داخله انام انا عروسه ومش هعمل حاجه، هو فين طارق دلوقتي؟.. 

روفان 

راح مع ريناد وسيف عشان يتكلمو معاه ويهدي وما رضيوش ياخدوني معاهم.. 

ليلي بحده

انتي ايه اللي مصحيكي يا مقصوفة الرقبه منك ليها وتيجو الصبح تطلعو عيني عشان تصحو للمدرسه اتنيلو غورو نامو يلااا.. 

ــــــــــ #بقلم_الكاتبه_رحاب_القاضي ــــــــ

_وتاني يوم الصبح في بيت سيف وريناد طلعت من اوضتها ولقيت طارق قاعد في الصاله ومدايق جداً، راحت ريناد وقعدت جنبيه وقالت.. 

ريناد

ما نمتش ليه؟.. 

طارق

نمت عادي يا ريناد؟.. 

ريناد

ما هو باين علي عينيك، ليه بتعمل كده يا طارق؟. 

طارق بدموع

انا عملت ايه هو حرام اتكلم حرام احلم بحاجه وابقي عايز احققها، انا ليا احلامي مش مفروض علية اعيش عشان احقق احلامكم انتو وفي الاخر ابقي في نظر ابوكي فاشل.. 

ريناد

سيبك من بابا خالص انت ناجح وكلنا عارفين انك ناجح ونجحت في اختيار بابا ليك وبقيت دكتور جامعي ومتفوق كمان، عايز تحقق حلمك في حاجه تانيه ما تحققه هنا ليه تسيبنا وتسافر، يا طارق والله كلنا هنا محتاجينلك انت بالنسبالنا انا واخواتك اب تاني قبل ما تبقي اخ لينا.. 

طارق

والبلد دي. حد. هيعرف يحقق فيها حلمه يا ريناد، انا كل حاجه هنا مش. عجباني شايفه الحرب اللي حوالينا دي في غزه ولبنان ومعظم الدول العربيه،احنا هنا في حرب اكبر منها...

ريناد 

فين بس ما احنا اهو في امان والدنيا تمام بطل بقي تعلق اعذر علي شمعات دايبه..

طارق بجمود

 الحرب مش بس رشاش وقنابل الحرب اللي بتستعمل دلوقتي حرب تخريب أسس و قيم و حضارات و اخلاق و دين كل حاجه ممكن نمسك فيها وسط طوفان الابتذال و القرف اللي عايشينه، احنا في اقذر مرحله من حرب الاخلاق يا ريناد كل واحد يحافظ علي اللي باقي من الاخلاق دي، وبلدك بقي اللي يمسك بمكارم الاخلاق فيها بتطرده، اقعد ليه انا هنا بقي.. 

ريناد بهدوء

فهمتك بس مش امريكا اللي فيها الاخلاق والمبادئ اللي بتدور عليها، طيب اسألك سؤال وترد بصراحه.. 

طارق بأهتمام 

اسألي ويا اقنعك يا تقنعيني.. 

ريناد

بيت بابا حسن مش اجمل بيت في الدنيا طبعا، بس افتكر كده ضحكة ماما واهتمام بابا وشقاوتنا عليك وهزارنا وخناقتنا وهات اجمل بيت في العالم بس البيت ده هتكون فيه لوحدك هتختار تكون فين؟.. 

سكت طارق وريناد قالت بهدوء

قبل كده قرأت مقوله بتقول" يهون العمر وانت وحيداً ويكون عزيزاً مع احبابك"، احنا محتاجينلك ومش هقولك اقعد تاني انت اختار وانت حر يا طارق انت مش صغير انت راجل اهو وبتعرف تفكر كويس ودكتور جامعي بتدرس لطلاب والمفروض انك قدوه للاجيال اللي بتدرسلها دي، فمش انا اللي هقولك. تعمل ايه... 

_سكت طارق وما ردش عليها والباب خبط في الوقت ده وقامت ريناد عشان تفتح فقالها طارق بحده.. 

طارق

رايحه فين يا بت انتي بمنظرك ده؟.. 

ريناد

في ايه طارق مانا قاعده في البيت هلبس ايه يعني؟.. 

طارق

هدوم البيت ما حدش غريب يشوفك بيها، وسيف بيسيبك تفتحي الباب كده.؟. 

ريناد بسخريه

سيف ما بقاش واخد باله من حاجه خالص، قوم افتح اللي بيخبط زمانه خلل.. 

_قام سيف وفتح الباب وكانت عمتهم عليااء اللي دخلت علي طول وحضنت طارق وقالتله.. 

علياء

ما تزعلش يا قلب عمتك حقك عليا انا.. 

طارق 

مش زعلان يا عمتي والله، بس انتي سيبتي ابويا وجيتي عندي.. 

علياء

لو ابوك اخويا فانتو كلكم ولادي.. 

طارق

ربنا يخليكي يا عمتي تعالي اتفضلي.. 

دخلو جوه وريناد

اهلا وسهلا يا عمتو ايه المفجأه الحلوه دي.. 

علياء

ما فيش احلي منك يا قلب عمتك، بصي بقي انا هقعد معاكي هنا لحد فرح عبدالله انا ماليش في الدوشه اللي هتعملها امك هناك دي.. 

ريناد 

طيب والله ياريت علي الاقل انا كمان اتحجج انك قاعده عندي وارتاح معاكي هنا من الدوشه بتاعت الفرح اللي هناك دي.. 

طارق 

طيب صحو سيف وانا هنزل اجيبلكم فطار من تحت وجااي، بقالك اد ايه يا لولو ما اكلتيش طعميه.. 

علياء

لا لا طعميه ايه، ادخل يا واد انت انا جايبه هنا سمنه بلدي لاختك وبيض وجبنه من البلد عشان تتغذي كويس هي واللي في بطنها هدخل اجهزلكم انا بأيديا.. 

طارق 

طيب هي هتتغذي بالاكل ده عشان اللي في بطنها احنا نتغذي معاها ليه؟.. 

ضحكت ريناد وعلياء قالت

يا واد بطل لماضه وانتي ادخلي صحي جوزك وانا هجهزلكم الفطار.. 

ريناد 

حاضر يا عمتي من عينيا.. 

دخلت ريناد اوضتها وعلياء قالت لطارق

يلا قوم نجهز الفطار.. 

طارق

لا يا عمتو انا باكل بس.. 

علياء

يا واد قوم انا مش بقدر اقف في المطبخ لوحدي.. 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصاوي، وبالاخص في شقة يزن كان واقف في اوضة اللبس وبيلبس هدومه ودخلت عنده سدره وقالت بهدوء.. 

سدره

انت لسه مصمم تنزل تفطر تحت معاهم.. 

يزن 

ايوه وياريت تعقلي وتنزلي تفطري معانا.. 

سدره 

المهم انا عيد ميلادي بعد اسبوع من دلوقتي، وكنت عايزه هديه معينه كده.. 

يزن بسخريه

ومين قالك اني هجيبلك هديه اصلا.. 

سدره 

ما بهزرش يا يزن، انا بجد نفسي في حاجه وانت هتجيبهالي.. 

قرب منها وقال بهدوء

انا عينيا ليكي، نفسك في ايه؟.. 

سدره ببراءه مصطنعه

بيت.. 

يزن 

بيت ايه؟.. 

سدره

بيت نعيش فيه انا وانت لوحدنا.. 

يزن

ليه هو حد هنا دايقك في حاجه؟.. 

سدره

ايوه باباك واخوك مدايقني ومش حابه اقعد معاهم في بيت واحد.. 

يزن بقلق

طيب بابا ومن يوم الفرح وانتي وهو مش متفقين تمام عرفناها، مال يوسف بيكي بقي؟.. 

تصنعت الحزن وقالت

مم ما فيش بس مش مرتاحه ولا واخده راحتي وهو هنا.. 

يزن بحده 

هو بيجي هنا اصلا، ده من لما اتجوزنا ما طلعش هنا ولا مره.. 

سدره بغيظ

ما علينا من يوسف، انت شايف باباك عمل ايه اصلا راح وجاب مرات ابويا اللي. مدت ايدها عليا وقعدها هنا في البيت وكأنه قاصد يستفزني ولولاك انت انا كنت سيبت البيت ومشيت.. 

يزن بغضب

يا بنتي دي عمتي ومالهاش غيرنا ومتخانقه مع ابوكي نرميها في الشارع يعني؟.. 

سدره بدموع

بتدافع عنها يا يزن ده بدل ما تروح وتهزأها عشان مدت ايدها عليا.. 

يزن 

وانتي بقي عملتي ايه عشان هي تعمل كده؟.. 

سدره بغيظ

انت ليه مش عايز تصدق اني مظلومه؟.. 

رد عليها وهو بيسرح شعره قدام المرايه

انا مش هسيب بيت اهلي يا سدره لاني ما شوفتش منهم حاجه وحشه، وعشان انا الكبير وهفضل لاخر عمري مع ابويا وامي.. 

وبصلها بهدوء وقال

هتروحي الجامعه النهارده؟.. 

سدره بغيظ

لا طالعه مع هدير صاحبتي.. 

يزن 

اوكي ما تتأخريش بره ومالكيش دعوه بماما وطنط بطه يا سدره بلاش تخليني اتحط في موقف وحش قدام اهلي.. 

قال كلامه ومشي وهي قالت بخبث

مااشي يا يزن انا بقي هخليك تبقي اول واحد ترمي اهلك دول تحت رجلك وتمشي معايا من هنا.. 

ــــــــــ #بقلم_الكاتبه_رحاب_القاضي ــــــــ

_وفي شقة عزالدين كان قاعد عبدالله بيفطر هو وزين، وبيتكلم في الفون مع عمر وقاله بعصبيه.. 

عبدالله

ما خلاص يا عمر بقولك الواد استفزني الاول، وانت اتصرف وحل الموضوع.. 

عمر

يا ولد النااس كل يوم والتاني عمال تخليني اهمل حالي ومالي اهنا واجي الم من ورااك، وقولتلك يا عبدالله انت دلوقتي مترشح لمنصب امهم واقل غلطه هتخليك تبعد عن المنصب ده ومليون مره اقولك انت كل تصرف بتعمله دلوقتي محسوب عليك.. 

عبدالله 

طيب معلش سيب اللي في ايدك النهارده وتعالي روح المطعم وحل الموضوع ده، عشان انا لو روحت هناك وشوفت الواد ده تاني هشرب من دم اللي جابوه.. 

عمر

طيب جاي، المهم خالي خلف عمال يقول كلام عفش عليك في البلد.. 

عبدالله

سيبه يقول اللي هواه يجيبه، الناس بتحبني ومش هتصدق عليا ولا كلمه من اللي بيقولها عليا.. 

عمر بقلق

لااااه ما هو مش بيغلط فيك بس المره دي، هو قلب الموضوع تار واخد حق.. 

اتحولت ملامح عبدالله للغضب وقال

اتجنن ده ولا ايه، طيب وصله ردي بقي وقوله عبدالله القاضي بيقولك الترعه عندك مليانه مايه اشرب منها زي ما تحب.. 

عمر بضيق

طيب ما تجرب نعمل قعده تانيه ونحل الموضوع ودي.. 

عبدالله 

خالك الودي عنده اني اتنازل وهو يترشح ويكسب زي كل سنه، بس ده لا يمكن يحصل ابداً وكده كده اخر الاسبوع باب الانسحاب هيقفل ويخبط دماغه في الحيط وقتها.. 

عمر

اللي يريحك يا ولد عمي وما تشيلش هم حاجه انت اهنا، الدعايه شغاله علي قدم وساق في الدايره كلها، ناقص بس حضورك.. 

عبدالله 

تمام يا عمر وانا في انتظارك هنا.. 

قفل مع عمر وزين قاله بهدوء

علي موضوع روان وكده؟.. 

عبدالله بضيق

ايوه واوعي يا زين حد. يعرف حاجه عن اللي قولتهولك ده، انا ما كنتش ناوي احكي لحد بس الموضوع مدايقني.. 

زين 

بص هو انا ما اعرفش روان من زمان يعني بس عمي حسن وطنط ليلي والعيله كلها ماتدلش ان حد. منهم ممكن يعمل حاجه وحشه، هو اكيد في سوء تفاهم زي ما هي قالتلك.. 

عبدالله 

انا واثق فيها يا زين والا ما كنتش هتجوزها النهارده، هو بس قلق وخوف ان حد يحاول يلفت نظرها او يكسب حبها غيري.. 

زين بنبره ساخره

او غيره بس يا بختك من حقك تغير وتقول وتبين، غيرك مالوش حق حتي يعترف باللي جواه حتي لو اعجاب محكوم عليه بالسكوت، محكوم عليه يحب ويكتم ويسكت وحتي لو شاف اللي بيحبه بيروح لغيره برضو لازم يتفرج وهو ساكت.. 

عبدالله بخبث

ده انت دااايب علي الاخر انت كمان.. 

طلع عزالدين من اوضته وقال بأنزعاج

ايه الدوشه اللي علي الصبح دي، انتو صاحيين ليه بدري اصلا.. 

زين 

انا عندي جامعه ورايح لماما عشان محتجاني في الشغل.. 

عبدالله 

وانا رايح مع روان عشان هنجيب الشبكه والحاجات بتاعت كتب الكتاب دي.. 

عزالدين 

ايوه صح انت النهارده كتب كتابك، نسيت اقولك صح.. 

عبدالله 

خير يا خالي ان شاء الله؟.. 

عزالدين 

البقاء لله علي عقلك اللي هيطير بسبب روان، وافتكر اني قولتلك بلااااش.. 

ضحك زين وعبدالله قال 

لا انا بعرف اتحكم بعقلي كويس، دعواتك بس لقلبي يا خالي. 

عزالدين غمزله وقال

لا جامده يا واد يا عبدالله فينك يا عمياء تشوفي القطه المغمضه بيقول ايه.. 

عبدالله 

ما علينا من قطه مغمضه دي، بس امي مش هنا راحت عند ريناد هتقعد عندها بعيد عن الدوشه.. 

عز بسخريه

دي راحت للدوشه بذاات نفسها ومش هتخلص من مشاكل سيف وريناد.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في بيت يونس الصاوي كانو قاعدين كلهم بيفطرو معادا سدره وبطه اللي كانت ملتزمه بالقعده في اوضتها، ويونس كل شويه يبص لشهد اللي تجاهلت وجوده تماما وحتي ما اهتمتش تحطله الفطار بتاعه قدامه زي كل يوم.. 

يونس

عايز شاي يا شهد؟.. 

مسكت موبيلها وقالت ببرود

الشاي قدامك اهو انا مستعجله عندي ميتنج مهم بعد اذنكم... 

بصولهم كلهم بقلق، ويونس قال ليارا بغيظ

هاتيلي شاي يا يارا.. 

يارا بهدوء

حاضر يا بابا من عينيا.. 

_قامت يارا وحطتله شاي في الفنجان بتاعه وحطته قدامه وقالت بهدوء.. 

يارا

اتفضل يا بابا.. 

_اخده يونس وهو مدايق واول ما شرب منه بص ليارا بعصبيه وقال... 

يونس

فين السكر يا بنتي؟!.. 

يارا بتوتر

ما حضرتك ما قولتليش حطي سكر يا بابا.. 

يونس بحده

يعني هو في شااي من غير سكر انتي كمان علي الصبح.. 

يزن

خلاص يا بابا حضرتك عايز اد ايه سكر.. 

يونس بحده 

مش عايز حاجه دي عيشه تقرف.. 

قال كلامه ومشي ويارا قالت بقلق

علي فكره بابا وماما متخانقين باين اووي عليهم.. 

يزن 

لا عادي بس يمكن بابا ادايق عشان ماما مشيت قبله لشغلها.. 

يارا 

وانت يا يوسف شايف ايه؟.. 

يوسف وهو مركز في موبيله

امم صح.. 

يزن

هو ايه اللي صح؟.. 

يوسف بلا اهتمام

اللي انتو بتقولوه ده.

_يارا شاوت ليزن عشان ياخد منه الفون ويزن بالفعل سحب منه الفون بسرعه وقاام جري ووراه يارا ويويف اتعصب جدا وقال... 

يوسف

ما تهزرش منك ليها هاتو الموبيل.. 

يزن وهو بيقرأ الشات اللي بينه وبين رضوي

طمنيني عليكي انتي احسن النهارده ولا لسه تعبانه وقلب ابيض.. 

بصله يزن وقال بسخريه 

قلب ابيض اوعي يكون ده قلبك يا حنين.. 

يارا بعدم فهم 

مين دي اللي بتكلمها شوشو؟.. 

قرب منه يوسف وقال بغيظ

ما تهزرش يا يزن وهات الموبيل.. 

يزن 

خد. يا عم موبيلك بس هو انت لحقت تشقطها امتي دي؟.. 

يوسف بحده 

ما تتكلمش عليها كده احنا زمايل شغل مش اكتر.. 

يزن 

طيب يا زميل الشغل وفر الاهتمام ده لخطيبتك اللي واخده اجازه مرضيه من الشغل وانت ولا داري عنها بحاجه.. 

يوسف 

الف سلامه عليها بس الموضوع ما يخصنيش انا اصلا مش هكمل في الموضوع ده... 

يزن بحده

هو ايه اللي مش هتكمل هي البت لعبه في ايدك، دي مش واحده من اللي بتتثلي بيهم دي بنت عمك وتبقي راجل وتحترم نفسك وتبطل كلامك السخيف ده.. 

يوسف بغيظ 

والله لو صعبانه عليك اووي يا حبيبي اتجوزها انت واهي احسن من ام اربعه واربعين اللي اتجوزتها.. 

ذقه يزن جامد وقال

انت قليل الادب ومش متربي.. 

يوسف بحده 

سيبتلك انت التربيه يا شيخ يزن.. 

يارا بخوف 

خلاص يا يوسف عيب كده، وانت يا يزن ما ينفعش تكلمه كده.. 

جات بطه في الوقت ده وقالت بقلق

في ايه يا ولاد صوتكم عالي ليه؟.. 

يارا بدموع

كانو بيهزرو سوا وقلبت بخنااق.. 

بطه بحده 

اقول ايه مش عيال صغيره اتفضلو علي شغلكم يا سكر منك ليه وما تهزروش مع بعض تاني يلا.. 

مشي يزن ويوسف قال لبطه 

روقي كده يا بطوط، ايه الحلاوه دي هو انتي بتيجي علي الزعل ولا ايه؟.. 

ضحكت يارا وبطه ردت عليه وقالت

بطل بكاشه يا واد عشان مش هنجحك في الماده بتاعتي لحد ما تذاكر وتنجح بمجهودك... 

يوسف 

اومال انا هستفاد منك امتي يا بطه.. 

بطه بحده 

اطلع بره يلااا روح شوف شغلك واياكم تخوفو اختكم تاني انت واخوك.. 

يوسف بضيق

هو اللي استفزني، علي العموم انا سيبهالكم ورايح شغلي بالسلامه.. 

_ومشي يوسف وراح شغله، وبطه قعدت هي ويارا يكملو فطارهم سوا.. 

ــــــــــ #بقلم_الكاتبه_رحاب_القاضي ــــــــ

_وبعد شويه في شغل يوسف كانت رضوي واقفه مع زمايلهم المهندسين وراح يوسف وقف جنبيه واداها شوكلاته وقال.. 

يوسف

خدي عشان ما تتعبيش.. 

اخدتها منه رضوي وقالت

ميرسي يا يوسف، كنا بنتكلم اننا هنبدأ في الخطوه التانيه العمال هيبدأو من النهارده.. 

يوسف

تمام اقعدي انتو ونورا خلصو باقي التصميمات وانا والشباب هنكون مع العمال.. 

رضوي 

هو ايه اللي اقعد هنا اخلص التصميمات انا هبقي واقفه مع العمال ونورا معايا.. 

يوسف 

يا ستي ده خشب وخبط وحركه كتيره انتو مش هتبقو قدها.. 

رضوي 

لو انت شايف اننا مش قدها يبقي تعالي اقعد مكاني هنا.. 

وبصت لنورا وقالت

جاهزه يا نورا.. 

نورا بقلق

اا اه جاهزه طبعا يا بشمهندسه رضوي.. 

_مشيت رضوي ومعاها نورا وراحو وقفو مع العمال وميلاد قال ليوسف اللي كان بيبص لرضوي بغيظ.. 

ميلاد

وبعدين يا بشمهندس يوسف هنقف نتفرج عليهم.. 

اسلام 

شكلنا وحش اووي.. 

محمود

ما برضك ما كانش يصح انهم يتدخلو في شغلنا.. 

ميلاد

لا ده علي فكره شغلنا كلنا وهما زيهم زينا هنا.. 

يوسف 

ميلاد معاه حق يلا بينا نقف معاهم، ونشوفهم بقي هيتحملو ولا لا... 

_وراحو فعلا بدأو الشغل وكانت رضوي بتشرف علي العمال والشغل زيهم واكتر منهم، علي عكس نورا اللي كانت خايفه من كل حاجه في المكان اللي هما واقفين فيه.. 

وقف يوسف جنب رضوي وقالها بقلق

يا بنتي انتي لسه تعبانه اتهدي بقي وكفايه حركه.. 

رضوي بتركيز مع العمال

لا انا مش تعباانه، بالعكس انا لما بكون بشتغل مش بحس بأي تعب، بقولك ايه انا عايزه اطلع فوق.. 

يوسف 

ليه بتقولي كده بعد الشر عليكي.. 

رضوي 

يا بني ادم عايزه اطلع فوق مع العمال.. 

يوسف 

ااااه بس هتطلعي ازاي ده كله خشب في خشب والسلم نفسه مش هتعرفي تطلعي عليه.. 

رضوي 

لا هطلع انا متعوده من زمان، انت لو خايف خليك انا بس لازم اشوف النظام فوق ايه والمساحات.. 

يوسف بنفاذ صبر

لا مش خايف يلا هطلع معاكي.. 

_وطلعت رضوي فعلا مع العمال وكانت بتابع الشغل بكل تركيز واهتمام ويوسف كمان اللي كان مركز معاها جدا.. 

رضوي 

هو في حاجه يا يوسف؟.. 

يوسف 

لا بس بتعلم منك ليكي طريقه مختلفه اهتمامك بالتفاصيل بيخلي كل حاجه مميزه.. 

رضوي

التفاصيل الصغيره الاهتمام بيها هو اللي بيخلي الشكل العام حلو، الهندسه قبل ما تكون مهنه هي فن لازم تبقي فنان وموهوب عشان تعرف تطلع من تحت ايدك شغل صعب حد غيرك يعمله وما يكونش تقليدي.. 

يوسف 

هو انتي طالعه بتقدير ايه من الجامعه.. 

رضوي 

الملف بتاعي كان معاك معقوله ما اخدتش بالك وقتها من تقديري.. 

يوسف بابتسامه بسيطه 

ما انا كنت مركز في حاجه تانيه وقتها... 

رضوي 

حاجة ايه؟.. 

يوسف بتوتر

ما انا لو قولتلك ايه الحاجه دي هترميني من فوق دلوقتي.. 

رضوي بغيظ

تقريبا فهمت او فهمت نيتك عمتاً، يلا ننزل عشان الناس تشوف شغلها.. 

_وكانت نازله هي ويوسف وفجأه حست الدنيا بتلف بيها، وبحركه تلقائيه مسكت في ايد يوسف اللي بصلها بعدم تصديق وقال.. 

يوسف 

احلفي انتي مسكتي ايدي بجد؟.. 

رضوي بثوت متألم ووشها بقي اصفر اووي

انا مش قادره اتحرك... 

يوسف بخوف حقيقي

طيب اهدي واسندي عليا وهننزل سوا.. 

رضوي بدموع

لا لا مش قادره خالص.. 

يوسف بخبث

طيب اشيلك وننزل ومش هتتعصبي.. 

رضوي بتعب

لا لا طبعا انا هنزل بس استني بس مش شايفه حاجه قدامي... 

_لف يوسف ايده بتردد علي كتفها ومسك ايدها جامد وقال بهدوء.. 

يوسف

اهدي خالص وامشي معايا خطوه خطوه.. 

رضوي بتعب

طيب يا ربنا ياخدك انت... 

يوسف وهو بيتحرك معاهت ببطئ

ايه قلة الذوق دي انا حتي بساعدك... 

رضوي 

ما هو انت السبب اصلا في اللي انا فيه ده.. 

يوسف قربها ليه بهدوء اكتر وقال بصوت واطي

انا اسف ووالله انا بتعب اكتر منك من لما شوفتك تعبانه بسببي.. 

رضوي بتعب

انا حاسه اني هرجع.. 

بعد عنها بسرعه وقال بقلق

لا انا بقرف بصي امسكي نفسك كده احنا خلاص قربنا ننزل.. 

_ونزلو فعلا تحت وخلاها قعدت علي اقرب كرسي، وجه ميلاد عندهم بسرعه وقال بقلق.. 

ميلاد

مالك يا بشمهندسه رضوي حضرتك كويسه.. 

يوسف 

كويسه يا ميلاد هاتلها عصير وحاجه تاكلها بسرعه.. 

ميلاد 

حاضر دقيقه واحده.. 

_ مشي ميلاد بسرعه ورضوي غمضت عيونها بألم وهي حاطه راسها علي ايدها اللي سنداها علي الكرسي، وشعرها كله جاي علي وشها.. 

_مد يوسف ايده بهدوء وشال شعرها من علي وشها وابتسم بهدوء وهو مركز في تفاصيل ملامحها من قريب وقال بتنهيده هادئه.. 

يوسف

انتي حلوه اووي يا رضوي، كل حاجه فيكي حلوه اووي.. 

فتحت عيونها وبصتله بعدم تصديق وقالت

انا بيتهيألي صح؟.. 

ضحك يوسف بهدوء وقال

ايوه دي هلوسه.. 

جه ميلاد واداها العصير وقال

بعت حد يجيبلك اكل يا بشمهندسه اشربي العصير وان شاء الله هتكوني كويسه.. 

ردت عليه رضوي بأبتسامه بسيطه 

شكرا يا ميلاد معلش تعبتك...  

ميلاد بهدوء

لا ولا يهمك يا بشمهندسه المهم انك تكوني كويسه.. 

بصله يوسف بغيظ وقال

طيب يا ميلاد روح شوف شغلك.. 

ميلاد

طيب هطمن علي البشمهندسه.. 

يوسف بحده 

كويسه يا حبيبي يلا روح شوف شغلك.. 

مشي ميلاد ورضوي بصت ليوسف بجمود وقالت

يلا علي شغلك انت كمان.. 

يوسف 

طيب اطمن عليكي الاول... 

رضوي بجمود

لا انا كويسه يا بشمهندس اتفضل شوف شغلك، وكده كده همشي عشان كتب كتاب اختي النهارده فهمشي بدري.. 

يوسف بضيق

هطلبلك اوبر مش هتعرفي تسوقي وانتي كده.. 

رضوي 

لا هعرف مالكش دعوه.. 

قرب منها فجأه وقال

بطلي عِند واستفزاز واسمعي الكلام.. 

تابع بنبره خبيثه 

انا لسه في حاجات كتير محتاجلك فيها علي فكره ومش مستغني عنك.. 

رضوي بتوتر

هو مين فين اللي وقع علي دماغه فينا انت مالك كده ما تتظبط.. 

يوسف غمزلها وقال

انتي اللي وقعتي بس انا اللي اتأثرت... 

_قال كلامه وبعد عنها وطلبلها فعلا اوبر، وبعدين راح كمل شغله مع المهندسين بس غصب عنه كان كل شويه يبصلها بقلق وخوف ان تحصلها حاجه، وافتكر من شويه لما مسكت ايده وكانت قريبه منه وابتسم بهدوء وقال لنفسه... 

يوسف 

والله ما هتبقي غير ليا انا يا رضوي حتي لو هحارب الدنيا عشانك فانا جاهز.. 

اسلام بخبث

احمم البشمهندسه بقيت كويسه يا بشمهندس يوسف، ممكن تخليك معانا شويه.. 

يوسف بتوتر

هاا ما انا معاكم اهو، روحي معلش يا نورا خليكي جنبها لانها ممكن تتعب تاني.. 

ابتسمو كلهم بهدوء فمشاعره واضحه للكل ونورا قالت

حاضر يا بشمهندس يوسف، تحت امرك.. 

ــــــــــ #بقلم_الكاتبه_رحاب_القاضي ــــــــ

_وبالليل في بيت الاستاذ حسن.. 

كانت العيله كلها متجمعه في جو جميل وحلو، وقرب زين من باباه وقاله.. 

زين 

بابا انا همشي عشان ما اتأخرش علي ماما.. 

عزالدين

مدام روحت ورجعت خلاص بات هنا وبكره الصبح روحلها.. 

زين 

بس انا وعدتها اني هاجي احضر كتب الكتاب وارجع تاني النهارده، معلش عشان ما تزعلش.. 

عزالدين 

طيب سلم علي عمك ومرات عمك وروح.. 

زين

حاضر.. 

وقام فعلا زين سلم علي حسن وليلي اللي قالتله

ليه كده بسرعه ياحبيبي ده احنا لسه قاعدين مع بعض.. 

زين 

معلش يا مرات عمي بس عشان ماما مستنياني النهارده.. 

لمياء بحده

وهي امك مستكترااك علينا الشويه دول، مش مكفيها حرمتنا منك سنين.. 

بصلها زين بضيق وليلي قالت بسرعه

روح يا حبيبي لمامتك وطنط لمياء بتهزر معاك، وخلي بالك منها وعقبال ما نفرح بيك يارب... 

زين بابتسامه بسيطه 

ربنا يخليكي يا طنط ليلي بعد اذنك... 

مشي زين وعز قال بحده لملياء

لميااء مالكيش دعوه بابني، وما تجبيش سيرة امه بالطريقه دي تاني قدامه ولا من ورااه.. 

لمياء بسخريه

انت لسه بتدافع عنها بعد كل اللي عملتو.. 

عز بحده 

عملته فيا انا مش فيكي وانا سامحتها مالكيش دعوه بقي والموضوع ما يتفتحش خالص يا لمياء ممكن؟.. 

لمياء بغيظ 

هو انا كنت اتكلمت اصلا عشان تزعقلي ما تتكلم يا حسن... 

حسن بصلها بلوم وقال

خلاص يا عز حصل خير.... 

طارق بجمود 

زيزو ممكن اخد عربيتك النهارده.. 

عز

خدها بس انت رايح فين؟.. 

طارق 

مش كتب الكتاب خلص وعملت الواجب، مالوش لزوم بقي اقعد هنا هروح اسهر مع صحابي واودعهم عشان خلاص مسافر بكره.. 

اتحولت ملامحهم كلهم للحزن وقام حسن وقال بحده

ما انت ما عندكش دم هقول ايه، نكدت عليهم فرحتهم وارتحت امشي بقي اصلا وجودك ما كانش ليه لازمه.. 

طارق بسخريه

ايوه ما انا عارف وعشان كده ماشي.. 

ليلي بدموع

خلاص يا حسن بقي ابوس ايدك، وانت يا طارق مش انت وعدتني انك هتفكر في الموضوع من تاني.. 

طارق 

لا مش هفكر تاني وخلاص هسافر ومش هتشوفو وشي تاني.. 

_قال كلامه وسابهم ومشي من غير ما ياخد حتي مفتاح العربيه من عزالدين.. 

ــــــــــــــــــــ

_وفي الوقت ده في شقة عم سيد كان قااعد بياخد العلاج بتاعه وجات عنده هنا وقالت.. 

هنا 

بابا هو انا لازم اسافر البلد عشان امتحن.. 

سيد بتعب

ايوه يا هنا عشان مش هينفع تمتحني هنا، ده. كويس وقدرنا نحولك علي الدروس بتاعتك هنا.. 

هنا بضيق

بس انا مش عايزه اروح اقعد عند خالتي تاني، اروح اقعد لوحدي في بيتنا واخلص امحانات وارجع.. 

سيد 

لا طبعا انا هبقي مطمن وانتي عند خالتك.. 

_خلص. كلامه ومسك قلبه بألم، فجريت عليه هنا بسرعه وقالت بقلق.. 

هنا 

انت كويس يا بابا.. 

سيد 

ايوه يا بنتي كويس، بس هنام عشان مش قادر اقعد.. 

هنا 

حاضر قوم علي مهلك نام جوه وانا هبقي اجي انام علي الكنبه هنا.. 

_ودخلت ابوها جوه اوضتها، واول ما افتكرت انها هترجع تاني الشرقيه عند خالتها اتملت عيونها دموع وقامت لبست حجابها علي ديرس طويل وبسيط وطلعت بره الشقه وخرجت بره العماره في الوقت ده الاسانسير اتفتح وطلع طارق اللي قالها بضيق.. 

طارق 

رايحه فين؟.. 

هنا مسحت دموعها بسرعه وقالت

اتخنقت ورايحه اتمشي شويه.. 

طارق بحده 

انتي تعرفي حاجه هنا ادخلي يا بت انتي جوه.. 

هنا بغيظ 

وانت مالك انت اصلاً.. 

_قالت كلامها وسابته ومشيت وهو كان لسه هيوقف تاكسي ويمشي، بس رجع ومشي وراها بهدوء من غير ما تاخد بالها، لحد ما لقاها وقفت قدام النيل في شارع هادي وفضلت تعيط اووي.. 

قعد طارق جنبيها وقال

بتعيطي ليه... 

هنا ببكاء

يا عم هو انت مالك بيا ما تسيبني في حالي.. 

طارق

قوليلي بس ابوكي عايز يخليكي تمشي من هنا، ولا يكون حد زعلك في العماره.. 

سكتت هنا وما ردتش عليه وقال هو بقلق

حد زعلك من العماره اتكلمي؟.. 

هنا ببكاء

انا مش عايزه ارجع لخالتي تاني وبابا مصمم اني اقعد عندها لما اجي امتحن.. 

طارق بفضول

ليه هي خالتك بتعذبك ولا ايه؟... 

هنا بحزن 

مش هي جوزها.. 

طارق 

يعني جوز خالتك هو اللي مش عايزك عنده في البيت؟.. 

هنا بتوتر بدموع

لا مش حتت ان مش عايزني في البيت، هو حاول يدايقني اكتر من مره بطريقه مش كويسه.... 

طارق بصدمه

انتي بتتكلمي جد، طيب ما قولتيش ليه لابوكي حاجه زي دي.. 

هنا بدموع

اكيد جوز خالتي هيكدب وسمعتي وسمعت بابا هتبقي وحشه، وبعدين انا كنت بعرف اوقفه عند. حده بس مش عايزه ارجع هناك تاني انا نفسياً مس هكزن مىتاحه هناك وهكون علي طول خايفه... 

طارق بضيق

انا مش مصدق اني بسمع الكلام ده منك، يا بنتي ده انتي يعتبر طفله اصلا.. 

بصتله هنا بحده وقالت

ما تحترم نفسك هو ايه اللي طفله دي انا اسمي انسه هنا.. 

طارق بسخريه

يا عمه اتنيلي، وخلاص هبقي اكلم ابوكي انا.. 

هنا بحزن 

هتكلمه فين وانت مسافر بكره.. 

طارق 

انتي عرفتي منين اني مسافر بكره؟.. 

هنا 

بابا هو اللي قالي.. 

سكت طارق وهنا بصتله بحزن وقالت

برغم ان مش فارق معايا وجودك اصلا، بس انا بجد نفسي ما تسافرش يعني حاسه اني غريبه في البلد دي كلها ما اعرفش غيرك انت وبابا ومن كلام بابا عنك حتي من قبل نا اجي هنا وانا حاسه اني اعرفك من زمان ومش مستغرباك.. 

ابتسم طارق وقال بهدوء

معلش مسيرك تتعودي علي المكان هنا وتنسي انك شوفتيني اصلا.. 

هنا بدموع 

معاك حق، يلا نمشي.. 

طارق بضيق

روحي انتي وانا قاعد هنا شويه.. 

هنا بأحراج 

ما بصراحه كده انا نسيت الطريق، فقوم روحني.. 

ضحك طارق وقال

ههههه انا. كان قلبي حاسس والله عشان كده جيت وراكي.. 

هنا بحماس 

الشارع فاضي تيجي نجري شويه.. 

طارق 

انسي يا ماما انا دكتور طارق الهواري اجري في الشارع.. 

هنا 

قفلتني وبوظت اللحظه اتنيل امشي قدامي... 

طارق 

امشي قدامك ليه هتضربي ولا ايه؟.. 

هنا

لا عشان اعرف الطريق وما ينفعش تمشي جنبي.. 

طارق بغيظ

بس ينفع نجري مع بعض في الشارع، هو انتي عبيطه.. 

هنا 

ما انا كنت عايزه البسك مصيبه واقول الحقوني عايز يخطفني ههههه.. 

طارق بنفاذ صبر

انا همشي وايااكي تيجي ورايا يارب تتوهي وما نلاقيكي تاني.. 

مشي طارق وهي ضحكت وقالت

ههههههههه استني والله بهزر يا عم الدكتور انت.. 

ــــــــــ #بقلم_الكاتبه_رحاب_القاضي ــــــ

_وفي بيت امير كان يوسف وعمرو صاحبه قاعدين عنده ويوسف ضحك بسخريه وقاله.. 

يوسف 

يعني البت زحلقتك ومشيت مع واحد غيرك وكمان الواد حط عليك قدامها... 

امير بغيظ

طلع خطيبها منزله صورتهم في كتب كتابها النهارده.. 

عمرو

خلاص بقي كبر دماغك منها مدام البنت اتجوزت.. 

امير بضيق

لا مش عارف حاولت اصلا من قبل ما اعرف انها اتجوزت اني ابعد عنها ما عرفتش، تعرفو انا كنت ناوي اروح اتقدملها.. 

بصو يوسف وعمرو لبعضهم بصدمه وهو قال

في ايه ما انا طبيعي كنت هتجوز، والبنت مختلفه بصراحه وانا شكلي كده اتنيلت وحبيتها ومهما حاولت اقنع نفسي انها زي كل اللي عرفتهم بطلع غلطان في الاخر.. 

يوسف بضيق

فاهمك وحاسس بيك اووي.. 

عمرو غمزله وقال

حاسس بيه ازاي يعني.. 

يوسف 

يا عم اتنيل برخامة اهلك دي، وانت مدام ما عرفتش تسيطر علي الموضوع وتخليها ليك والبت راحت لغيرك لو حبيتها بجد طلعها من دماغك.. 

_سكت امير وما ردش عليه وفي نفس الوقت فتح يوسف حساب رضوي علي الانستجرام وفضل بتفرج علي صورها مع اهلها، وجاب صوره ليها لوحدها وكالعاده حفظها عنده وقعد عمرو جنبيه وقال.. 

عمرو 

اوباا لا جامده مين دي؟.. 

قفل يوسف الموبيل بسرعه وقاله بحده 

وانت مال اهلك واي حاجه تشوفها عندي تعلق عليها، افرض دي كانت اختي او خطيبتي مثلا.. 

عمرو

انا مش قصدي يا يوسف وانا عارف اختك وخطيبتك ودي واحده غيرهم.. 

امير بفضول

مين دي انا كمان عايز اشوف.. 

اتعصب يوسف وقالهم 

لا ما حدش هيشوف يا حلو منك ليه ودي مش للهزار، ونقفل الموضوع احسن عشان ما اقلبش ام اليوم عليكم.. 

عمرو

يا عم في ايه احنا بنهزر عادي.. 

يوسف

هزاركم بقي رخمم اووي وانا ماااشي ولما تبطلو خفة دم انت وهو هبقي اجي.. 

_قال. كلامه ومشي فعلا وهو متعصب من كلام عمرو عنها وانه شافها وعجبته، وافتكر في اللحظن دي عائشه وان عمره ما غار عليها او ما حصلتش حاجه تخليه يغير عليها علي عكس رضوي اللي لو اي حد كلامها مجرد كلام عادي بيكون مدايق.. 

ــــــــــ #بقلم_الكاتبه_رحاب_القاضي ــــــــ

_وفي ببت يونس الصاوي رجع بيته بالليل بعد ما خلص شغله وكانت شهد نايمه علي سريرها وهي بتقلب في موبيلها.. 

ابتسم يونس بهدوء وقال

معلش ما عرفتش اتعشي معاكم النهارده كان عندي شغل مهم.. 

_ما ردتش عليه وابتسمت وهي بتقلب في موبيلها وقال يونس بضيق.. 

يونس

ممكن اتعشي ولا تقيل عليكي.. 

اتنهدت بضيق وقالتله

ايوه تقيل عليا، المطبخ عندك ونعمه موجوده تحت واكتر من شغاله كمان جم جداد خليهم يجهزولك شالله خروف مش هيقولو لا..

يونس بحده 

وانا متجوزك انتي يا شهد مش متجوز الشغالين.. 

شهد ببرود

انت تقول وتشوف اللي عايزه، انما انا مش هعملك اي حاجه من اللي كنت بعملها زمان ولا هبقي مراتك زي الاول تاني ووجودي معاك انا قولتلك سببه ومجرد وقت و خلاص، انت بقي مش عاجبك الاتفاق ده موافقه نروح دلوقتي قدام ولادك وكل اللي نعرفهم ويعرفونا واقولهم اني هتطلق منك عشان انت راجل خاين وبتاع ستات وعينيك زايغه ولا عامل قيمه لمراتك ولا ولادك ولا حتي لببتك اللي بقيت طولك، ده انت يا رخيص حتي مش خايف عليها من اللي بتعمله ده.. 

يونس بغضب 

انا سيبهالك وماشي مدام مش عايزه تسمعي ولا تفهمي حاجه.. 

شهد بحده 

في ستين داهيه ده يا الف هنا ليا اني هرتاح منك شويه.... 

بصلها يونس بحزن وهي قالت بسخريه

لا مش هتصعب عليا ده انا لاول مره شمتانه فيك، ومقدره اللي انت فيه ان يا حرام الست اللي كانت بتتفنن عشان تسعدك ما بقتش طيقاك، بس دي بقي اسعد لحظه في حياتي عشان قدرت اعاملك بالطريقه اللي نفسي اعاملك بيها من زمان.. 

_ما ردش عليها يونس ومشي وهي رمت موبيلها جنبيها وفضلت تعيط بحزن وألم، بس بسرعه مسحت دموعها وقالت لنفسها بجمود.. 

شهد

مش هعيط ومش هضعف تاني يا يونس، ده وقتك انت اللي تندم وتعيط وانا اللي ارتاح.. 

ــــــــــ #بقلم_الكاتبه_رحاب_القاضي ــــــــ

_وتاني يوم الصبح، طلع عبدالله من شقة عزالدين لقي روان قاعده علي السلم وهي لابسه بلوزه موف طويله وبنطلون جبنز واسع شويه وعامله شعرها علي شكل ضفيرتين بطريقه شيك وحلوه... 

عبدالله 

انتي قاعده ليه هنا؟.. 

روان 

ماما قالتلي انك ماشي دلوقتي فمستنياااك... 

عبدالله 

مستنياني انا؟!.. 

روان بهدوء

ايوه عشان انت لسه مدايق من اللي حصل في المطعم، حتي امبارح من بعد كتب الكتاب وانت قعدت مع سيف وما اتكلمتش معايا ولا حتي قولتلي مبروك ولا اي حاجه من اللي بيعملها اي عريس مبسوط بعروسته.. 

عبدالله بضيق

معلش يا روان بس انا زعلي بيبقي صعب شويه.. 

روان قربت منه وقالت 

انا اسفه واللي حصل ده مش هيتكرر تاني.. 

حط ايده علي راسها وقال

انتي كويسه، ايه الهدوء ده.. 

روان بتوتر

احمم ما يعني انت بقيت جوزي خلاص.. 

ابتسم غصب عنه وقال

بقيت جوزي طالعه منك حلوه.. 

روان بثقه 

انا كل حاجه بتكون مني حلوه علي فكره.. 

عبدالله 

طيب بالراحه علينا شويه، انا علي قدي برضو يا عم الواثق.. 

ضحكت بهدوء وقالتله

يعني انت مش زعلان خلاص؟.. 

مسك ايدها بهدوء وقال

مش زعلان بس بشرط.. 

روان بتوتر من اول ما مسك ايدها 

شش شرط ايه؟.. 

قرب منها شويه وقال

كان في حضن بعد كتب الكتاب انا كنت زعلان منك وما عرفتش اخده فده وقته بقي.. 

روان وشها قلب احمر وقالت

لا لا لا عبدالله احنا علي السلم وبعدين ده انت مسكت ايدي بس اتوترت  وو.. 

_قبل ما تكمل كلامها قرب منها هو وبكل هدوء حضنها وهي اتنفضت بتوتر وخوف وكسوف، وزاد خوفها وتوترها اكتر لما قالها بصوت واطي وهي لسه في حصنه.. 

عبدالله 

بحبك يا روان، وانا اسعد واحد في الدنيا عشان عرفت اوصلك وتبقي مراتي.. 

بعد عنها بهدوء وحضن وشها بأيديه الاتنين وقال

اوعدك اني عمري ما هخليكي تندمي علي اختيارك ليا وعلي قد السعاده اللي حسيت بيها دلوقتي وانا في حضنك هخليكي اسعد واحده في الدنيا وانتي معايا.. 

_نبرة الصدق اللي في كلامه والثقه اللي بينكلم بيها وهو بيوعدها براحتها معاه خلي عيونها تلمع بالدموع وقلبها بدأ يدق بسرعه ليه هو مش لاي حد. تاني وبطريقه غريبه وجديده جدا عليها.. 

ابتسم عبدالله بهدوء وقال

لا انا قولت كتير بقي هتفضلي ساكته برضو.. 

روان بتوتر وكسوف شديد 

ماما بتنده عليا فاوعي كده بقي.. 

_وذقته جامد ودخلت شقتهم وقفلت الباب جامد، وهو بص للباب بضحكه هاديه زادته وسامه، وطلع عمر في الوقت ده من شقة عزالدين وقال... 

عمر

يا حنين ده انت طلعت معبي جواك كتير وساكت يا ولد عمي... 

عبدالله بتوتر

انت واقف من امتي؟.. 

عمر بخبث

من وقت الحضن يا عريس، عقبالي يارب.. 

عبدالله بغيظ

صلي علي النبي يا عمر مش ناقص حسد الموضوع.. 

ضحك عمر وقال

ههههه عليه افضل الصلاة والسلام يا سيدي يلا بينا عاد نشوف اللي ورانا.. 

عبدالله 

يلاا بس قولي الاول عملت ايه في موضوع الواد بتاع المطعم؟.. 

عمر

تعرف ده طلع ولد مين؟.. 

عبدالله 

ولد مين؟.. 

عمر

سامح الدمنهوري شريك ابوك الله يرحمه في الفندق بتاع الغردقه.. 

عبدالله بضيق

اممم وبعدين يعني.. 

عمر

يعني الموضوع محلول ما تشيلش هم الراجل شكله عارف ان ولده مش مظبوط... 

عبدالله بضيق

طيب ربك يعدلها... 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصاوي كان يونس قاعد بيفطر وجنبيه يزن اللي قاله برجاء.. 

يزن 

ها يا بابا قولت ايه عشان خاطري.. 

يونس 

انت عايز تعمل لمراتك عيد ميلاد انا مالي.. 

يزن 

انا عايز اصلح علاقتك بيها وتعتبرها زي يارا وهي تشوفك زي ابوها، بدل جو الضراير ده.. 

يونس 

ضراير؟ ما علينا المطلوب مني ايه؟.. 

يزن 

تجمع الكل في عيد الميلاد بتاعها وتصالحهم علي بعض وانت استاذ وبرنس في المواضيع دي.. 

يونس

حاضر يا يزن عشان خاطرك انت بس.. 

يزن 

ربنا يخليك ليا يا اجمل اب في الدنيا.. 

_نزلت في الوقت ده شهد من فوق ومعاها يارا فبصلهم يونس وقال لشهد بحده.. 

يونس 

علي فين؟.. 

شهد بلامبالاه

هفطر مع فيروز وهاجر وجميله جايه مصر كام يوم اجازه فهكون مشغوله معاهم الفتره الجايه.. 

يارا 

وانا عندي سنتر وماما هتوصلني في طريقها.. 

يونس 

هتفطرو فين يا شهد؟.. 

ردت عليه وهي ماشيه ببرود

لسه مش عارفه لما هشوف البنات هنقرر سوا.. 

_بصت يارا لمامتها بصدمه من تصرفها ورتحت وراها بسرعه ويونس قال ليزن بغيظ.. 

يونس

شايف امك؟.. 

يزن 

هو حضرتك مزعلها في حاجه يا بابا؟.. 

يونس بتوتر

ها لا بس عشان بغير عليها شويه ادايقت.. 

ابتسم يزن بهدوء ويونس قال

هو فين اخوك؟.. 

يزن بضيق

راح شغله من شويه وقال مش جعان.. 

يونس 

عمك كلمني وجاي هو وحامد بالليل وشكله اخوك خرب الدنيا مع عيشه.. 

يزن بهدوء

اللي فيه الخير يقدمه ربنا يا بابا، وارجوك ما تنساش الموضوع بتاع سدره.. 

يونس 

حاضر مش هنسي وخلي بالك من نفسك وابقي اطمن علي اخوك.. 

_ما ردش عليه يزن ومشي وهو مدايق جدا من تصرفات اخوه سواء معاه او مع عائشه بنت عمهم.. 

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن كان طارق طالع من اوضته وهو ماسك الشنط بتاعته ولقي ليلي ورضوي وروان وروفان وروز قاعدين بيعيطو والبيت كله شكله حزين بسبب سفره.. 

ساب الشنطه وقال بدموع 

يا جماعه بلاش كده ارجوكم، خلوني امشي وانا مش زعلان عليكم.. 

ليلي ببكاء

انا كنت ناويه ما اتكلمش معاك تاني خالص لو سافرت بس مش هيهون عليا تمشي وانا مزعلاك.. 

قرب منها طارق وقال بدموع 

هكلمك كل يوم وفي اي وقت هتكلميني هرد عليكي ومش هخليكي تحسي اني بعيد خالص.. 

وبص لروان وقال بابتسامه بسيطه 

العروسه اللي مطلعه عيني.. 

روان ببكاء 

خلي بالك من نفسك وابقي كلمني علي طول.. 

حضنها طارق بهدوء وقال

من عينيا حاضر بس انتي هتبقي فضيالي بقي ولا هتكوني مشغوله في عبدالله.. 

_ضحكت روان من وسط بكاءها بهدوء، وقرب عبدالله من رضوي وقالها بهدوء.. 

طارق 

انا سايبك راجل البيت يا اسطا بعد مني.. 

رضوي بدموع 

ما تقولش راجل طيب، وخلي بالك من نفسك واياك ترجع من غير ما تبقي ناجح فاهم ولا لا.. 

طارق بأبتسامه هاديه 

حاضر يا رضوي وان شاء الله ارجع الاقيكي متجوزه ومعاكي عيلين تلاته كده يصدعونا.. 

رضوي 

وعلي الله انت بقي ما ترجعلنااش بخوجايه وتقولنا مراتي وتقول لبابا مستر هج عبد الغفور.. 

ضحك طارق وقالها

هو بعد اللي يشوفك انتي واخواتك يتجوز ده انتو قفلتوني من الصنف كله.. 

حضنته رضوي وقالت 

هستناك ترجع بسرعه اوعي تتأخر علينا او الغربه تاخدك وتنسانا.. 

بعد عنها وقال بدموع 

مستحيل حد ينسي اللي ليه.. 

_وقعد علي الارض قدام روز وروفان وقبل ما يقول اي حاجه سابته روان وهي بتعيط ودخلت اوضة حسن اللي رفض حتي يطلع يسلم علي طارق، بصلها طارق بحزن وبعدين قال لروز.. 

طارق 

هتوحشيني يا ملاك البيت.. 

روز ببكاء

خليك شويه ما تمشيش.. 

طارق بحزن

مانا هاجي بسرعه يا روز مش هتأخر عليكم، المهم ما تعيطيش وما تتخانقيش مع روفان.. 

روز 

هي اللي بتتخانق معايا والله.. 

طارق 

في دي معاكي حق بس ناخدها علي قد عقلها معلش وقوليلها علي طول ان طارق بيحبنا اووي وان انتي وهي بناتي مش اخواتي وبس.. 

ليلي بدموع 

مش هتسلم علي ريناد؟.. 

طارق قام وقال

سلمت عليها وعلي عمتي علياء قبل ما اجي اخد الحاجه من هنا.. 

روان 

طيب وبابا مش هتسلم عليه؟. 

نزبت دموعه ومسحها بسرعه وقال 

ابقو سلمولي عليه، يلا مع السلامه.. 

_واخد الشنط بتاعته ومشي ووقف قدام العماره بتاعتهم تحت قبل ما يركب التاكسي وبص للبيت ودموعه نزلت بحزن والم، وبعدين ركب التاكسي اللي اخده ومشي... 

_في الوقت ده. طلع حسن من اوضته فبصتله ليلي بحزن وقالت بلوم وعتاب.. 

ليلي

لو كنت قولتله مره واحده ما تمشيش ابنك ما كانش هيمشي يا حسن... 

حسن بحده 

يعني هو انا اللي قولتله يسافر يا ليلي؟.. 

ليلي بحده 

ايوه انت طول عمرك بتعامله اقل من اخواته، وانا مليون مره اقولك في الحنيه ما تفرقش بين الولد والبنت لان كلنا ولد او بنت كبير او صغير محتاجين للحنيه والكلمه الحلوه وان حد يطيب خاطرنا وما يفرقش بينا وبين حد. تاني في المعامله، بس انت عمرك ما سمعتني في الموضوع ده.. 

رضوي بقلق 

خلاص يا ماما بلاش الكلام ده دلوقتي، معلش يا بابا انت عارف هي زعلانه ازاي علي طارق.. 

_سابهم حسن وطلع بره البيت كله، وليلي كانت لسه بتعيط علي طارق.. 

ــــــــــ #بقلم_الكاتبه_رحاب_القاضي ــــــــ

_وبعد شويه في المطار، نزل طارق من التاكسي وقبل ما يدخل المطار وقف لما سمع صوت حسن ورااه اللي قاله.. 

حسن 

استني يا طارق.. 

بصله طارق بعدم تصديق، ونزل حسن بسرعه من عربيته ووقف قدامه وطارق قال بجمود.. 

طارق

معقوله حضرتك جاي تودعني بنفسك.. 

حسن بهدوء

لا مش جاي اودعك، جاي اقولك ما تمشيش... 

طارق بسخريه 

كتر خيرك وشكرا تعبت نفسك، بس انا زي ما انت قولت واخد قرار ومش هرجع فيه.. 

جه بمشي بس حسن مسكه من دراعه جامد وقال

انا محتاجلك وامك واخواتك محتاجينلك، اديني اهو بقولك محتاجلك جنبي محتاج لابني معايا مش هقدر علي الحمل ده لوحدي وعايزك معايا.. 

_سكت طارق وبص للناحيه التانيه بدموع وحسن قال بحده وغضب.. 

حسن 

هو انا بشحتك عشان تقعد معانا، انا عملتلك ايه عشان تشوفني وحش كده، فاكر اني بحب اخواتك اكتر منك تبقي غبي ده انا ما ارتحتش واتنهدت وقولت ربما بيحبني وعايز يريحني في الدنيا غير لما انت اتولدت، عمك علي طول كان سايبني ومسافر وما كانش ليا صحاب ولما انت جيت قولت هتبقي صاحبي واخويا قبل ما تبقي ابني، ليه بقي عايز تسيبني وتمشي.. 

طارق بدموع 

انا مش عايز اقعد هنا مش. مرتاح هنا مش هعرف انجح هنا، انا اسف انا غلطان في حقك ومش قد ثقتك فيا بس انا لازم امشي.. 

ــ واخد طارق شنطه ومشي فعلا من قدام حسن اللي موبيله رن برقم رضوي، فرد بسرعه وقال.. 

حسن وهو بيمسح دموعه 

ايوه يا رضوي.. 

رضوي ببكاء

بابا الحقني ماما اغمي عليها ومش عارفين نفوقها.. 

_بص حسن بسرعه لطارق اللي مديله ضهره وقال بصوت عالي وخوف.. 

حسن 

طااارق الحق امك... 

_وقف طارق ورجع بسرعه لحسن وقال بقلق وخوف.. 

طارق 

مالها ماما يا بابا، رد. عليا مالها ماما؟؟؟.. 

ـــــــــــــــــــــــــــــ 

_وبعد شويه وصل حسن وطارق المستشفي وكان عزالدين مع رضوي وروان هناك واقفين بره الاوضه اللي فيها ليلي.. 

حسن بقلق وخوف

مالها ليلي يا بنات، مالها ليلي يا عز حصلها ايه؟.. 

عز 

والله ما اعرف انا كنت نايم وبناتك جم زي القضي المستعجل صحوني ولقيت ليلي فاقده الوعي طلبنا الاسعاف وجينا هنا علي طول، وروز وروفان مع بنت عم سيد ما كانش ينفع نجيبهم هنا.. 

طارق بقلق وخوف

طيب حصل ايه ما انا سيبتها كويسه.. 

رضوي 

لا طارق ما كانتش كويسن ماما تعبت من زعلها عليك.. 

طلع الدكتور في الوقت ده وقال

فين طارق؟.. 

طارق 

نعم ايوه انا.. 

الدكتور

ادخل يا حبيبي لمامتك دي شكلها خايفه عليك اووي.. 

_دخل بسرعه طارق عند ليلي اللي كانت نايمه علي السرير الطبي وشكلها تعبان فعلا وقعد جنبيها علي ركبته علي الارض وقال بدموع.. 

طارق

حقك عليا يا ماما انا اسف، والله ما هبعد عمك ولا هسيبك انتي وبابا واخواتي وشالله حتي افضل طول عمري فاشل، المهم اني افضل معاكي وما اشوفكيش تعباانه كده تاني.. 

ليلي بدموع

انت بتضحك عليا وهترجع تمشي تاني.. 

ابتسم طارق بهدوء وقال

والله العظيم ما همشي يا ماما وهفضل معاكم علي طول.. 

_دخل حسن في الوقت ده وعز ورضوي وروان، وسألهم طارق بقلق وقال.. 

طارق

خير يا جماعه الدكتور قال ايه؟.. 

ابتسم حسن بهدوء وعز قال

والله يا ابني ما عارف ارد عليك بأيه ده انا مكسوفلك.. 

ضحكت رضوي هي وروان وليلي قالت بخوف

لا لا لا ما تقولوش انا عندي البواسير.. 

ضحكو كلهم جداً وحسن قعد جنبيها وقال بهدوء

مبروك يا حبيبتي انتي حامل.. 

طارق بصدمه

نعممممم.. 

عز بسخريه

مش بقولك مكسوفلك.. 

_تفتكرو بقي هيحصل ايه؟... 

ـــــــــــــــــــــــــــــــــــــــــــــــــــــــــ 

#بقلم_الكاتبه_رحاب_القاضي

    الفصل الحادي عشر الجزء الثالث من هنا 

لمتابعة باقي الرواية زوروا قناتنا على التليجرام من هنا    

تعديل المقال